शूराः वयं धीराः वयम्

नियमः 'रामः, सः, सीता, देवालयः, पीतः, बलशालिनः' इत्यादीनि पदानि नामपदानि सन्ति। 'रामः' इति पदस्य मूलम् 'राम' अस्ति। नामपदस्य मूलरूपं 'प्रातिपदिकम्' इति कथ्यते।

वयं सर्वे भारतीयाः शूराः, वीराः, धैर्यशालिनः च स्मः। सर्वे गुणशालिनः बलशालिनः विजेतारः च स्मः। वयं दृढसंकल्पयुक्ताः, लोभरहिताः, साहसयुक्ताः च स्मः। वयं सर्वे भारतवासिनः उत्तमभावेन जनानां सेवां कुर्मः, सर्वेषां शुभचिन्तनं कुर्मः। अस्माकं हृदये धन-अधिककामना, सुख-वासना, कपटभावना च न सन्ति। तेजोयुक्ताः वयं भारतीयाः ऊर्जापूर्वकं दृढतया च कार्यं कुर्मः। वयं निर्भयाः दृढशक्त्या युक्ताः युद्धक्षेत्रे सर्वदा नीतिपूर्वकं विजयम् इच्छामः। अन्ततः प्रार्थना — हे भगवन्! हे संसारस्य स्वामिन्! भवान् अस्माकं कृते सर्वेषु कार्येषु उज्ज्वलं शुभं च विजयं प्रयच्छतु।

१. गीतस्य रचनाकारः — अस्य गीतस्य रचनाकारः श्रीधरः भास्करः वर्णेकरः अस्ति। एषः सुप्रसिद्धः आधुनिकः कविः अस्ति। वर्णेकरमहोदयस्य जन्म महाराष्ट्र-राज्ये नागपुरनगरे अभवत्। एषः अनेकानि काव्यानि, नाटकानि, गीतानि च रचितवान्। वर्णेकरमहोदयः राष्ट्रपतिपुरस्कारेण अपि सम्मानितः अस्ति।